Thursday, September 22, 2016

கீரை வாங்கலையோ...கீரை!!

அமரந்த் சீட்ஸ்/ ராஜ்கிரா சீட்ஸ் (Amaranth seeds/Rajgira seeds) என்ற பெயரில் இங்கே இந்தியன் மளிகைக்கடைகளில் கிடைக்கும் விதைகளை வாங்கி விதைத்து கீரை வளர்க்கலாம் என்ற தகவல் தெரிந்ததால் முயற்சித்து பார்க்கலாம் என ஆரம்பித்த கீரை வளர்ப்பு பற்றிய பதிவு இது. 
பக்கத்து வீட்டுத் தோழியிடம் இருந்து கிடைத்த அமரந்த் சீட்ஸ்...கீரை விதைகள்.. 
என் பெண்ணின் குட்டிக்கைகள் உதவிசெய்ய,
இரண்டு சிறிய தொட்டிகளில் விதைத்தாயிற்று...கீரைகள் முளைவிட்டு வளரலாயின.
குட்டிக்கால்களுடன் குட்டிக்கீரைகள்!! :) கீரைகள் வளர்வதைக் கண்டு சற்றே பெரிய தொட்டிகளிலும் கொஞ்சம் விதைகள் தூவி வளர்ந்த கீரைகள். 
பறித்து, பருப்புடன் சேர்த்து சமைத்து சாப்பிட்டாயிற்று. கீரைகளைப் பறிக்கையில் வேருடன் பறிக்காமல், தண்டுகளை மட்டும் நறுக்கிக் கொண்டால், மீண்டும் அதே தண்டிலிருந்து கீரைகள் துளிர்க்கின்றன. அப்படி இரண்டாவது முறை பறித்த கீரை..பருப்புடன் சேர்த்து கடைந்த கோவை ஸ்பெஷல்!! 
இரண்டாவது முறை நறுக்கிய பின் இப்படி இருந்த கீரைத்தொட்டி,
சில நாட்களில் இப்போது...
இப்படி இருக்கிறது.  
:) 
வீட்டிலேயே கீரை வளர்த்து சாப்பிட விரும்பும் வெளிநாட்டு வாசிகள் சிறிய தொட்டிகளில் இந்தக் கீரையை வளர்க்கலாம். எளிதில் முளைத்து வளர்கிறது. நாமே வளர்க்கும் காய்-கனி-கீரைகளின் ருசி அறிந்தவர்கள் கண்டிப்பாக முயற்சிக்கலாம்!! :D 

Friday, September 2, 2016

காலிஃப்ளவர் ஃப்ரை

தேவையான பொருட்கள் 
காலிஃப்ளவர் - 11/4கப் 
கறிவேப்பிலை - கொஞ்சம்
சீரகம், சோம்பு - தலா1/2டீஸ்பூன் 
மஞ்சள்தூள் - 1/8டீஸ்புன்
சில்லி சிக்கன் மசாலா பொடி - 2 டீஸ்பூன்
எண்ணை 
உப்பு 

செய்முறை 
காலிஃப்ளவரை கழுவிவிட்டு சிறு துண்டுகளாக நறுக்கவும்.
காடாயில் எண்ணெய் காயவைத்து சீரகம் சோம்பு தாளித்து காலிஃப்ளவர் துண்டுகள் சேர்த்து வதக்கவும். 
காய் லேசாக வதங்கியதும் மஞ்சள்தூள், உப்பு சேர்த்து கிளறிவிட்டு, மூடி போட்டு வேகவிடவும். 
காலிஃப்ளவர் முக்கால்பாகம் வெந்ததும் மசாலாபொடி மற்றும் கறிவேப்பிலையச் சேர்த்து கிளறவும்.
காய் நன்றாக வெந்து மசாலாவாடை அடங்கியதும் பரிமாறவும்.
விரைவில் செய்யக்கூடிய காரசாரமான பொரியல் இது. சில்லி சிக்கன் மசாலா விரும்பாதவர்கள் மிளகாய்ப்பொடி-கரம் மசாலா பொடி சேர்க்கலாம். அல்லது சாம்பார் பொடியும் சேர்க்கலாம். காய் வேக தண்ணீர் சேர்க்கவேண்டியதில்லை, மூடி போட்டு வைக்கையில் அதுவே நீர் விட்டு வெந்துவிடும். சுவைக்கேற்ப காரப்பொடியை சேர்த்துக்கொள்ளவும். சாதம் வகைகளுடன் சுவையாக இருக்கும்.

Friday, August 19, 2016

தக்காளியின் கதை..!

எல்லாரும் நல்லா இருக்கீங்களா? நாந்தான் தக்காளி பேசறேன்....நலம், நலமறிய ஆஆஆஆஆவல்!! :))))) 
என் பேரு பேபி டொமாட்டோ (எ) தக்காளி! எனக்கு இம்பூட்டு அயகான பேரை வச்சது எங்க வீட்டு லயா பேபி! ;) ;)
 
பூச்செடி வாங்க நர்சரிக்கு வந்தவங்க கண்ணில தளதளன்னு இருந்த நானும் கண்ணில படவே என்னையும் வீட்டுக்கு கூட்டிட்டு வந்துட்டாங்க. தக்காளிச்செடியே வாங்கக்கூடாதுன்னு முடிவுல இருந்தவுகளையும் மயக்கி, வீட்டுக்கு வந்தவளாக்கும் நானு! B-) 

வீட்டுக்கு வந்த சிலநாள் நானும் தொட்டியிலயே இருந்தேன்..அப்புறமா தரையை (ரொம்ப கஷ்டப்பட்டு) தோண்டி,  எனக்கு ஒரு புது வீடு கட்டி கொடுத்தாங்க. பார்க்க துளசி மாடம் மாதிரியே அயகான வீடு! எனக்கும் வீடு நல்லா புடிச்சுப்போச்சு...பூ பூத்து ஒரு (ஒரே ஒரு) பிஞ்சும் வளர்த்தேன். 

அப்பப்போ எங்க வீட்டு குட்டியம்மா  என்கிட்ட வந்து பேசுவாங்க. "வாட் இஸ் திஸ்? பேபி டொமாட்டோ" அப்படின்னு அவங்கம்மா சொல்லி கொடுக்கவும் அதை அப்படியே புடிச்சுகிட்டு வரும்போதெல்லாம் "ஹாய் பேபீஸ்..ஹாய் பேபி டொமாட்டோ!" அப்படின்னு பேசிட்டே வருவாங்க. அப்புறம் "பை பை பேபீஸ்!"-நு பொறுப்பா டாட்டா சொல்லிட்டும் போவாங்க.

செடியிலே ஒரே ஒரு காய்தான் இருக்குன்னதும், நிறைய காய் வர டெக்னிக்கு, அப்படீன்னு என்னோட இலைகளை எல்லாம் சரிபாதியா வெட்டி விட்டாங்க..அது மட்டுமா?? டெய்லி வந்து என்னை சுண்டி சுண்டி விட்டாங்க...அவ்வ்வ்வ்வ்!!! வலிக்க்க்க்க்கும்..ஹூம்!! எங்க வலியெல்லாம் ஆருக்கு புரியுது??! அம்மா வந்து சுண்டி விடறதும், என்னோட வலிக்கு மருந்து போடற மாதிரி பேபி லயம் வந்து "ஹாய் பேபி டொமாட்டோ!" அப்படின்னு சொல்லுறதுமா சில நாட்கள் போனது.

என்னதான் எண்ணையத் தடவிட்டு புரண்டாலும் ஒட்டறதுதான் ஒட்டும்ன்றமாதிரி நான் ஒரே ஒரு தக்காளிதான் வளத்தேன். ஹிஹி..!! அந்த ஒரு தக்காளியும் நாளொரு மேனியும் பொழுதொரு வண்ணமுமா வளர்ந்துச்சு. முகம் சிவந்துச்சு, பழுத்துச்சு..!! :)
தக்காளி பழுத்தாச்சு...பேபி வந்து பறிச்சாச்சு...அரிஞ்சு சமைச்சு சாப்ட்டும் ஆச்சு!! :D
இப்படியாக ஒரு முறைக்கு ஒரு தக்காளியாக எங்க வீட்டு தக்காளிச்செடி காய்ச்சுக்கொண்டு இருக்கிறாள். இரண்டாவது பழம் பழுத்தாச்சு! மூணாவது பிஞ்சும் வந்திருக்கு. யாருப்பா அங்க...கிலோ கணக்கில தக்காளி பறிக்கிறவங்க எல்லாம் எங்க தக்காளிப்பொண்ணைப் பாத்து கண்ணு போடாதீங்க!! அக்காங்க்க்க்க்க்க்க்க்க்க்!! ;) :) 

Thursday, August 11, 2016

ப்ரோக்கலி பொரியல் /Broccoli Stir-fry

 
தேவையான பொருட்கள் 
ப்ரோக்கலி - 11/2 கப் (சுத்தம் செய்து நறுக்கிய துண்டுகள்)
வெங்காயம் - 2டேபிள்ஸ்பூன் (நீளவாக்கில் நறுக்கியது)
பச்சைமிளகாய் -1 
மிளகுத்தூள் - 1 டீஸ்பூன் 
கடுகு-1/2டீஸ்பூன்
உப்பு 
எண்ணெய் 

செய்முறை
நறுக்கிய ப்ரோக்கலி துண்டுகளை ஸ்டீமரில் வைத்து..

4-5 நிமிடங்கள் ஆவியில் வேகவைத்து எடுக்கவும்.
வேகவைத்த ப்ரோக்கலி தயார். 
கடாயில் எண்ணெய் காயவைத்து, கடுகு தாளித்து,  நறுக்கிய வெங்காயம் பச்சைமிளகாய் சேர்த்து வதக்கவும்.
வெங்காயம் வதங்கியதும் வெந்த ப்ரோக்கலி துண்டுகள், தேவையான உப்பு-மிளகுத்தூள் சேர்த்து நன்றாக கலந்து விடவும்.
காய் வெங்காயத்துடன் கலந்து லேசாக சூடானவுடன் அடுப்பிலிருந்து இறக்கி பரிமாறவும்.
க்விக் அண்ட் ஈஸி ப்ரோக்கலி பொரியல் ரெடி. 

Thursday, July 28, 2016

பாகற்காய் புளிக்குழம்பு / Bittermelon puli kuzhambu

தேவையான பொருட்கள் 
பாகற்காய் - 2 
வெங்காயம் - 1
பூண்டு - 5பற்கள்
கறிவேப்பிலை - கொஞ்சம்
கடுகு - 1/2டீஸ்பூன்
வரமிளகாய் -1 
மஞ்சள்தூள் - 1/4டீஸ்பூன்
சக்தி வத்தக்குழம்பு பொடி - 1டேபிள்ஸ்பூன் 
தக்காளி - 2
புளிக்கரைசல் - 1/4 கப்
தேங்காய்த் துருவல் - 1/4கப்
உப்பு
நல்லெண்ணெய் 
சர்க்கரை - 1டீஸ்பூன் 

செய்முறை
பாகற்காயை கழுவி, விதைகளை நீக்கிவிட்டு வட்டமாக நறுக்கவும்.
வெங்காயம், தக்காளி, பூண்டையும் நறுக்கிவைக்கவும். 
புளியை ஊறவைத்து திக்காக கரைத்து வைக்கவும். 
தேங்காயை கொஞ்சமாக தண்ணீர் விட்டு மைய அரைத்துவைக்கவும்.

1.பாத்திரத்தில் எண்ணெய் காயவைத்து, கடுகு வரமிளகாய் தாளித்து நறுக்கிய பாகற்காயை சேர்த்து வதக்கவும். 
2. பாகற்காய் ஓரளவுக்கு வதங்கியதும் நறுக்கிய பூண்டு வெங்காயம் சேர்த்து வதக்கவும்.
3. வெங்காயம் வதங்கியதும் உப்பு மஞ்சள்தூள் சேர்க்கவும்.
4. தக்காளி சேர்த்து வதக்கவும். 
5. தக்காளி குழைய வதங்கியதும் வத்தக்குழம்பு பொடி சேர்த்து வதக்கி,
6. புளிக்கரைசலை சேர்க்கவும்.
7. தேவையான தண்ணீர் சேர்த்து கொதிக்கவிடவும்.
8. புளி பச்சைவாசம் போக கொதித்ததும் அரைத்த தேங்காய் விழுது, சர்க்கரை சேர்த்து, தேவையான தண்ணீரும் சேர்த்து கொதிக்கவிடவும்.
9. குழம்பு நன்கு கொதித்து எண்ணெய் பிரிந்து வந்ததும் அடுப்பிலிருந்து இறக்கவும். சுவையான பாகற்காய் புளிக்குழம்பு ரெடி.
சாதம், இட்லி-தோசை எல்லாவற்றுடனும் அருமையாக இருக்கும். குழம்பை செய்து ஒரு நாள் வைத்திருந்து சாப்பிட்டால் இன்னும் சுவை அதிகம்! ;) :) 

Wednesday, July 20, 2016

கண்களுக்கு குளிர்ச்சியாய்...

எங்கள் வீட்டுப் பூக்கள் சில... சூரியனைப் பார்த்துத் திரும்பி நிற்கும் சூரியகாந்தி! 
சிவப்பும் வெள்ளையுமாய்க் கலந்து மிரட்டும் அழகு ரோஜா..
 உட்புறம் வெள்ளையும், வெளிப்புறம் மஞ்சளுமாய் இதழ்கள் கொண்ட அழகுப்பூ...
குட்டிக்குட்டியாய்ப் பூக்கும் மினி டேலியா...
 செடிகள் மட்டும்தான் அழகாய்ப்பூக்குமா? நானும்தான்... என்று குலைதள்ளி கொல்லென்று சிரிக்கும் Palm tree..
A rose is a rose is a rose is a rose is a rose!! Always the best!! Red rose with amazing fragrance! 
My little flower Laya, the Prettiest one in my garden! :) 
Special Treat from Coimbatore...Ootti Varki from A1 Chips!! Hope you enjoyed the post! Thank you! 

Thursday, July 7, 2016

பச்சை வெங்காயச் சட்னி

தேவையான பொருட்கள் 
தேங்காய் 
வரமிளகாய்
புளி
வெங்காயம்   

செய்முறை 
மிக்ஸியில் தேங்காய், புளி, வரமிளகாய் சேர்த்து தண்ணீரில்லாமல் அரைக்கவும். ஓரளவு அரைபட்டதும் தேவையான உப்பு, கொஞ்சமாக தண்ணீர் சேர்த்து அரைக்கவும்.

கடைசியாக நறுக்கிய வெங்காயம் சேர்த்து அரைத்து எடுக்கவும்.

குறிப்பு 
தேங்காய், மிளகாய், புளி, வெங்காயம் எல்லாமே அவரவர் ருசிக்கேற்ப கூடக்குறைய சேர்க்கலாம். :) வெங்காயம் மட்டும் கவனமாகச் சேருங்க, அதிகம் சேர்த்தா கசக்குது என்று சட்னி செய்து பார்த்த ஒருவர் சொல்லியிருக்காங்க. 
சட்னியை தாளிக்க வேண்டிய அவசியம் இல்லை. கஞ்சி வகைகள், இட்லி, தோசை, சப்பாத்தி எல்லாவற்றுடனும் சூப்பராக ஜோடி சேரும். 

Wednesday, June 15, 2016

கோவைக்காய் வறுவல் / Tindora fry/ Ivy gourd fry

கோவையில் இருக்கும்வரை, "கோவைக் கொடி" எங்கேனும் வேலிகளில் படர்ந்திருக்கும், அவ்வளவு சீக்கிரம் கண்ணுக்கு சிக்காது. அதன் கீரையப் பறித்து சமைப்பார்கள், கோவைப்பழம் சாப்பிடுவார்கள் என்பது மட்டுமே பரிச்சயம். கோவைக்காயைச் சமைப்பார்கள் என்பதே இங்கே வந்த பிறகுதான் தெரியவந்தது. :) இப்போதெல்லாம் கோவையிலும் கோவைக்காய்கள் விற்க ஆரம்பித்துவிட்டார்களாம்! சர்க்கரை வியாதிக்காரர்களுக்கு மிகவும் நல்லது என்ற ஒரு பாயிண்டை வைத்தே கோவைக்காய் வி.ஐ.பி. ஆகியிருக்கக்கூடும்! ;) 

தேவையான பொருட்கள்
கோவைக்காய் - 150கிராம்
மிளகாய்த்தூள்- 11/2டீஸ்பூன்
உப்பு
எண்ணெய்
கடுகு 
உளுந்துப்பருப்பு 

செய்முறை
கோவைக்காயை கழுவி, ஓரங்களை நறுக்கிவிட்டு நீளவாக்கில் மெல்லிய துண்டுகளாக நறுக்கிவைக்கவும். 

கடாயில் எண்ணெய் காயவைத்து கடு-உளுந்து தாளித்து,நறுக்கிய கோவைக்காய் துண்டுகள் சேர்த்து வதக்கவும்.
 காய் ஓரளவு வதங்கியதும் உப்பு சேர்த்து வதக்கவும்.
 முக்கால் பாகம் வெந்ததும் மிளகாய்த்தூள் சேர்த்து சுருள வதக்கவும்.
நன்கு வெந்து லேசாக முறுவலானதும் அடுப்பிலிருந்து இறக்கவும்.
சாம்பார், புளிக்குழம்பு, ரசம், தயிர் சாதம் எல்லாவற்றுடனும் ஜோடி சேரும் சிம்பிள் அண்ட் யம்மி கோவைக்காய் வறுவல் தயார்!  

Friday, June 3, 2016

பீட்ரூட் குருமா

ஜஸ்ட் ஃபார் எ சேஞ்ச்...இந்த முறை "படம் பார்த்து பொருளறிக" முறையில் ஒரு பதிவு!! :) 


விளக்கம் தேவைப்பட்டால் கருத்துப்பெட்டியில் தாராளமாகக் கேட்கலாம். இந்த பீட்ரூட் குருமா சாதம், சப்பாத்தி இரண்டுக்குமே நன்றாக இருக்கும்.
~~~
1. வெங்காயம், ப.மிளகாய்,  தக்காளி அரிந்து வைக்கவும். 
2. பீட்ரூட்டை தோல் சீவி, சிறு துண்டுகளாக நறுக்கி வைக்கவும்.
3. குக்கரில் எண்ணெய் காயவைத்து கடுகு தாளித்து நறுக்கிய வெங்காயம், ப.மிளகாய், தக்காளி சேர்த்து தக்காளி குழையும் வரை வதக்கவும்.
4. நறுக்கிய பீட்ரூட்டையும் சேர்த்து வதக்கவும்.
5. இதற்கிடையில் மிக்ஸியில் 3 வரமிளகாய், 1 டீஸ்பூன் கொத்துமல்லி விதை, 1 டீஸ்பூன் சீரகம்,  ஏழெட்டு மிளகு, கொஞ்சம் தேங்காய், 1 டேபிள்ஸ்பூன் வறுத்த வேர்க்கடலை சேர்த்து கொஞ்சமாகத் தண்ணீர் விட்டு அரைக்கவும். 
6. அரைத்த மசாலாவை குக்கரில் உள்ள காயுடன் சேர்த்து கலக்கவும். 

7. தேவைக்கு தண்ணீர் விட்டு (சுமார் 1, ஒன்றேகால் கப்) சுவைக்கு உப்பும் சேர்த்து குக்கரை மூடி மிதமான தீயில் 2 விசில் வரும்வரை சமைக்கவும். 
8. ப்ரெஷ்ஷர் அடங்கியதும் குக்கரை திறந்து நறுக்கிய கொத்துமல்லி இலை தூவி பரிமாறவும். 

Friday, May 20, 2016

மொச்சைக் கொட்டை குழம்பு / Field Beans Kuzhambu

மழை விட்டும் தூவானம் விடாத கதையாக அவரைக்காய்.... தொடர்கிறது. :))) 
முற்றிய காய்களாகப் பொறுக்கி வந்து, உரித்து கர்நாடகா ஸ்டைல்ல குழம்பு வைப்போம் என மனக்கோட்டையுடன் வாங்கிவந்தேன். உரிச்சு, தண்ணீரில் 3-4 மணி நேரம் ஊறவத்த பிறகு, அடுத்த ஸ்டெப்புக்கு போவோம் என அடுத்த லேயர் தோலை உரிக்கப் பாத்தா....ஊஹூம்!! கை நகம்தான் வலிக்குதே தவிர வேற ஏதும் நடக்கலை!!! வெறுத்து போய் அப்படியே ஃப்ரிட்ஜில் வைத்து அடுத்த நாள் குக்கரில் போட்டு வேகவைத்து எங்கூட்டு ஸ்டைல்ல குழம்பு வச்சேன், சூப்பரா இருந்துச்சு! ஒய் டோண்ட் யு டிரை??! ;) :) 


போன பாராவில் சொன்ன விஷயங்களுக்கு டெமோ, மேலே உள்ள கொலாஜ்!! ஹிஹி...!! :) சரி, இனி குழம்பு வைக்கப்போலாம் வாங்க!

தேவையான பொருட்கள்
வெங்காயம் - 1
பச்சைமிளகாய் -1
கறிவேப்பிலை - கொஞ்சம்
பூண்டு - நாலைந்து பற்கள்
தக்காளி -2
உருளைக்கிழங்கு (சிறியதாக) -1
புளிக்கரைசல் -கால் கப்
கடுகு - 1/2டீஸ்பூன்
சாம்பார் பொடி - 1 டேபிள்ஸ்பூன்
தேங்காய்த்துருவல் - 3 டேபிள்ஸ்பூன்
உப்பு
எண்ணெய்

செய்முறை 
வெங்காயம், ப.மிளகாய், தக்காளியை நறுக்கி வைக்கவும். பூண்டையும் உரித்து நறுக்கவும். உருளைக் கிழங்கை நீளவாக்கில் நறுக்கி தண்ணீரில் போட்டுவைக்கவும்.
பாத்திரத்தில் எண்ணெய் காயவைத்து , கடுகு தாளித்து மேற்சொன்னவற்றை ஒன்றன் பின் ஒன்றாகச் சேர்த்து வதக்கவும்.
அதனுடன் தக்காளி, சாம்பார் பொடி, உப்பு சேர்த்து வதக்கவும்.
தக்காளி மசிந்ததும் வேகவைத்த மொச்சை, நீளவாக்கில் நறுக்கிய உருளைக் கிழங்கு சேர்த்து வதக்கவும்.
அதனுடன் புளிக்கரைசல் சேர்த்து கொதிக்கவிடவும்.
தேங்காயை கொஞ்சமாகத் தண்ணீர் விட்டு அரைத்துவைக்கவும். கிழங்கு வெந்தவுடன் தேங்காய் அரைத்ததைச் சேர்க்கவும். தேவையான தண்ணீர் சேர்த்து கொதிக்கவிடவும்.

குழம்பு கொதித்து எண்ணெய் பிரிந்து வந்ததும், அரை டீஸ்பூன் சர்க்கரை (விரும்பினால்) சேர்த்து இறக்கவும். 
இந்தக் குழம்பிற்கு நான் உபயோகித்த சாம்பார்பொடி! :) 
ஊரிலிருந்து மொத்தமாக சாம்பார்ப் பொடி, ரசப்பொடிகள் வாங்கி வந்து ஃப்ரீஸரில் ஸ்டோர் செய்துகொள்வேன். சமீபத்தில் சாம்பார் பொடி மட்டிலும் காலியாகிவிட்டது. கலிஃபோர்னியாவில் இந்தப்பக்கம் இன்னும் தென்னிந்திய மசாலாப்பொடிகள் அதிகம் வருவதில்லை. சக்தி மசாலாவின் சில பொடிகளும், ஆச்சி மசாலாவும் கிடைக்க ஆரம்பித்திருக்கின்றன. சக்தி சாம்பார் பௌடர் கிடைக்காததால் ஆச்சி வந்துட்டாங்க. சுவை நன்றாக இருக்கிறது. :))) 

LinkWithin

Related Posts with Thumbnails